17 de maio, Día das Letras Galegas

O 17 de maio é unha data moi importante para todas as galegas e galegos, xa que se celebra o Día das Letras Galegas. Esta celebración foi instituída pola Real Academia Galega no ano 1963 co fin de homenaxear a aqueles persoeiros que destacasen pola súa creación literaria ou pola defensa da nosa prezada lingua. Nesta edición enaltécese a figura de Francisco Fernández del Riego, escritor e fundador da Editorial Galaxia. 

No día de hoxe levamos a cabo numerosas actividades coas que rendimos tributo á lingua galega, piar fundamental da nosa cultura. Como cada ano non faltaron a esta cita a lectura, a escritura, a música ou as labores manuais; mais a actividade máis especial no día de hoxe foi a nosa participación no ObraAberto, unha celebración organizada polo Obradoiro CAB no cal se mesturaron a paixón polo noso idioma e un dos deportes favoritos da cidade compostelá: o baloncesto.

A vida de Rosalía de Castro.... con marionetas

Dentro dos actos conmemorativos do Día de Rosalía, a pasada semana puidemos desfrutar dun pequeno teatro de títeres organizado polo Equipo de Dinamización da Lingua Galega do noso centro.

A través desta representación, levada a cabo polos compañeiros/as de sexto curso, as alumnas e alumnos de primeiro e segundo profundizamos nalgúns dos aspectos máis importantes da vida e obra desta autora, a cal é considerada como unha das figuras máis importantes da nosa literatura.

Celebramos o Entroido

A pasada semana, todas as alumnas e alumnos de Casa do Neno celebramos unha das festividades máis caracterísicas da nosa comunidade: o Entroido.

Comezamos a semana co mandato da Meca, unha serie de instrucións que debíamos seguir para cada un dos días da semana, as cales provocaban unha chea de gargalladas á nosa chegada cada mañá.

O broche de ouro a esta semana de ledicia e diversión chegou a tarde do venres, momento no que desfrutamos dunha gran Festa de Entroido na cal non faltou o baile, o xogo, a diversión e, como non, os doces típicos desta festividade.

Venres de celebracións!

Este pasado venres, 18 de novembro, foi unha xornada chea de celebracións para toda a familia da Casa do Neno.

En primeiro lugar, co Día do pixama pretendimos conmemorar o Día Mundial da Infancia (20 de novembro), dotando de visibilidade o acollemento familiar e o dereito de todas as nenas e nenos a medrar no seo dunha familia rodeados de amor e tenrura.

Continuamos esta xornada festiva cun dos festexos máis populares da nosa comunidade: o magosto. Mentres degustábamos unhas saborosas castañas, tivemos ocasión de cantar e bailar cunha gran selección de pezas musicais galegas de diferentes estilos e épocas.

Como colofón a este espléndido día, o Equipo de Dinamización da Lingua Galega agasallounos cunha adaptación de xogos tradicionais como os birlos, a mariola, a chave ou a rá.